काठमाडौं– वित्तिय ऋणको चपेटामा परेका पात्रको भोगाईलाई प्रस्तुत गरिएको फिल्म ‘कौसीद’को फर्स्ट लुक टिजर सार्वजनिक भएको छ । अभिनेत्री ऋचा शर्माको प्रस्तुतिमा तयार भएको फिल्मका निर्देशक कुमार भास्कर हुन् ।

भास्करले कोभिड महामारीकाबीच फिल्मको छायांकनसँगै पोष्ट प्रोडक्सनको काम सकाउँदै पहिलो मुहार सार्वजनिक गरिएको बताए ।

टिजरमा पिँजडामा खरायो बोकेको अवस्थामा अभिनेता भोलाराज सापकोटा एक्लै फिचर्ड छन् । निर्देशक भास्करले टिजरले पिँजडामा परेको जीवनको उन्मुक्तिको संघर्ष भाव बोल्ने जनाए ।

फिल्ममा भोलाराज सापकोटा र ऋचा शर्मासँगै रुपेश दाहाल, परिक्षित विक्रम राणा, सदिक्षा गौतम, निर्भिक भट्टराई र सागर भट्टराई मुख्य भुमिकामा छन् । फिल्मको निर्माता केदार भुसाल हुन् भने कार्यकारी निर्मातामा दिमेश श्रेष्ठ तथा सह–निर्मातामा लक्ष्मण बानियाँ छन् ।

निर्देशक भास्करकै पटकथामा बनेको फिल्मको कथा लेखन नव विजय प्रकाश श्रेष्ठ र धिर्जन थपलियाले गरेका छन् । निसाल पौडेलले छायांकन गरेको फिल्ममा मित्र डि. गुरुङ र भिम विश्वकर्माको सम्पादन रहेको छ । बड पिक्चर्सको ब्यानरमा यो फिल्म निर्माण भएको हो ।