काठमाडौं– जापान, फिलिपिन्स तथा भारतकाबीच यही अप्रिल महिनाभित्र सम्मेलन हुने भएको छ । इण्डो प्यासिफिक क्षेत्रका तीन महत्वपूर्ण मुलुकहरू भारत, जापान र फिलिपिन्सका रक्षा तथा कूटनीतिक क्षेत्रका शीर्षस्थ अधिकारीबीच जापानमा सम्मेलन हुन लागेको जापानको क्योदो समाचार संस्थाले जनाएको छ ।

यसका लागि फिलिपिन्सका विदेशमन्त्री टोयोडोरो लोक्सिन तथा राष्ट्रिय रक्षामन्त्री डेल्फिन लोरेन्जानाले यही महिना जापानको भ्रमण गर्ने छन् । त्यस्तै, भारतीय विदेशमन्त्री एस जयशंकर तथा रक्षामन्त्री राजनाथ सिंह पनि जापान जाने कार्यक्रम रहेको जनाइएको छ ।

दुई मुलुकका मन्त्रीहरुले जापानी समकक्षीहरू विदेशमन्त्री योशिमासा हायाशी तथा रक्षामन्त्री नोबुओ किशीसँग भेटवार्ता गर्ने क्यादोले जनाएको छ ।

गतमहिना जापानी प्रधानमन्त्री फुमियो किशिदाले भारतको भ्रमण गरी भारतीय प्रधानमन्त्रीलाई भेटेका थिए । जापान र भारत दुबै मुलुक चार देशको सुरक्षा समूह क्वाडमा पनि सहभागी छन् ।