काठमाडौं– रुसी राष्ट्रपति भ्लादिमिर पुटिनको हत्या गर्न आह्वान गर्ने अमेरिकी सिनेटरको बयानमा ह्वाइट हाउसले असहमती जनाएको छ । ह्वाइट हाउसकी प्रवक्ता जेन साकीले नियमित पत्रकार सम्मेलनका क्रममा पुटिनको हत्या गर्न आह्वान गर्ने अमेरिकी सिनेटर लिन्जी ग्राहमको धारणामा असहमती जनाएकी हुन् ।

पुटिनको हत्या गर्नुपर्ने अमेरिकी सरकारको वा वर्तमान प्रशासनमा काम गर्ने कसैको पनि धारणा नरहेको उनको भनाइ छ । विवादस्पद अभिव्यक्ति दिएपछि साउथ क्यारोलाइना राज्यका सिनेटर ग्राहमको अहिले अमेरिकाका रिपब्लिकन र डेमोक्र्याट दुबै पार्टीका नेताहरुले ‘गैर जिम्मेवार’ भन्दै आलोचना गरिरहेको अमेरिकी सञ्चारमाध्यमले जनाएका छन् ।

ग्राहमले रुसी सैनिक अधिकारीहरुतर्फ लक्षित गरी ट्विट गर्दै पुटिनलाई सिध्याउनुपर्ने वक्तव्य दिएका थिए ।