काठमाडौँ- बाहुबली सिरिज मार्फत विश्वभर साउथ इन्डियन फिल्मलाई पुर्‍याउन सफल निर्देशक एसएस राजमौली निर्देशित पछिल्लो फिल्म हो ‘आरआरआर’ । साउथका दुई स्टार जुनीएर एन्टीआर र राम चरणलाई एउटै फिल्ममा ल्याएका निर्देशक राजमौली निर्देशित फिल्मले नयाँ नयाँ रेकर्ड बनाइरहेको छ । बलिउडबाट अजय देवगन र आलिया भट्टलाई समेत कास्ट गरेका निर्देशक राजमौलीको फिल्म ‘आरआरआर’ ले हलिउडमा पनि उत्तिकै व्यापार गरिरहेको छ ।

व्यापारसँगै यो फिल्मले अर्को उपलब्धि पनि हासिल गरेको छ । हलिउड क्रिटिक्स एसोसिएसनले बाँड्ने अवार्डमा यो फिल्म रनर अप बन्न सफल भएको छ । यसका लागि ‘आरआरआर’ले टम क्रुज अभिनीत ‘टप गन : माभरिक’ र रोबर्ट प्याटिसन अभिनीत ‘दि ब्याटमेन’ लाई जितेको हो ।

हलिउड क्रिटिक एसोसिएसनले बाँड्ने ‘एचसीए मिड सिजन’ अवार्डमा उत्कृष्ट फिल्मको रनर अप बन्न सफल भएको हो । वर्षको मध्यमा आयोजना गरिने अवार्ड भने ‘एभरिथिङ एभरीह्वेर अल एट वन्स’ ले जित्यो । उत्कृष्ट फिल्मको दौडमा ‘आरआरआर’बाहेक ‘टर्निङ रेड’, ‘चा चा रियल स्मुथ’, ‘एल्भिस’, ‘दि नर्थमेन’ आदि फिल्म थिए ।

अमेरिकामा दोहोर्‍याएर रिलिज भएको फिल्मले दोस्रो रिलिजमा समीक्षक तथा दर्शकबाट प्रशस्त तारिफ पाएको थियो । फिल्मको भव्य क्यान भासले सबैलाई प्रभावित गरेको थियो ।