काठमाडौँ– नेपाल एशोसिएसन अफ टुर एण्ड ट्राभल एजेन्ट्स (नाट्टा)ले एयरलाइन्स टिकेटिङ, टुर प्रोडक्ट डेभलपमेन्ट र कस्टोमर केयर तालिम सञ्चालन गरिरहेको छ । पर्यटन व्यवसाय विकास र विस्तारका लागि आवश्यक सीपयुक्त जनशक्ति उत्पादन गर्ने उद्देश्यका साथ नाट्टाले देशको सात वटै प्रदेश लाई लक्षित गरि एयरलाइन्स टिकेटिङ, टुर प्रोडक्ट डेभलपमेन्ट र कस्टोमर केयर तालिम सञ्चालन गरिरहेको हो । सबै कार्यक्रमको संयोजन नाट्टा सचिव तथा तालिम संयोजक युविका भण्डारीले गरिरहेकी छिन् ।

अन्तराष्ट्रिय श्रम संगठन र नेपाल उद्योग वाणिज्य महासंघको सहयोगमा जम्मा ३० जना प्रशिक्षार्थीका लागि १ महिने कार्यस्थलमा आधारित तालिम कार्यक्रमको शुभारम्भ कार्तिक १६ गते नाट्टा अध्यक्ष रमेश थापाले काठमाडौँमा गरे । ति प्रशिक्षार्थीहरूलाई ८ दिनको सैद्धान्तिक ज्ञान र स्थलगत अध्ययन पछि पर्यटन व्यवसाय सञ्चालन भइरहेको कम्पनीहरूमा व्यवहारिक सीप आर्जनका लागि पठाइने छ ।

त्यसै गरि  संयुक्त राष्ट्र संघ विकास कार्यक्रमको सहयोगमा नेपाल पर्यटन बोर्डको जीविकोपार्जनका लागि दिगो पर्यटन परियोजना अन्तरगत काठमाडौँ, बुटवल, पोखरा, नेपालगन्ज, वीरगन्ज र विराटनगर गरि जम्मा ६ वटा स्थानमा आयोजना हुने गरि तालिम कार्यक्रमहरू शुरु भएको छ । यि सबै स्थानमा ६०/६० जना को लागि अवसर उपलब्ध हुने र जम्मा २४० जना प्रशिक्षार्थीले ५ दिने तालिम लिनेछन् ।