काठमाडौँ– ल्याटिन अमेरिकी मुलुक अर्जेन्टिनाकी उपराष्ट्रपति क्रिस्टिना फर्नान्डेज डे किर्चनरमाथिको हत्याप्रयास असफल भएको छ ।

बन्दुकधारीले प्रहार गर्न खोजेको बन्दुकबाट गोली ननिस्किएपछि उनमाथिको हत्याप्रयास विफल भएको हो ।

सामाजिक सञ्जालमा भाइरल एक भिडियोमा समर्थकहरुका साथ रहेकी उनको नजिकैबाट उनीमाथि कसैले बन्दुक तेस्र्याएजस्तो देखिन्छ ।
उनी अदालतबाट घर फर्कनेक्रममा घटना भएको बीबीसीले जनाएको छ ।

पूर्वराष्ट्रपति समेत रहेकी उनीमाथि भ्रष्टाचारको अभियोग लागेको छ । यद्यपि सन् २००७ देखि सन् २०१५ सम्म मुलुकको राष्ट्रपतिको रुपमा काम गरेकी उनले भ्रष्टाचारको आरोप अस्वीकार गर्दै आएकी छिन् ।

स्थानीय सञ्चारमाध्यमले जनाएअनुसार बन्दुकधारीलाई प्रहरीले नियन्त्रणमा लिएर अनुसन्धान सुरु गरेको छ । बन्दुकधारी ३५ वर्षे ब्रजिलियन नागरिक रहेको बताइएको छ ।

प्रहरीले हत्याप्रयासको उद्देश्यबारे हालसम्म स्पष्ट नभइसकेको जनाएको छ ।

राष्ट्रपति अल्बेर्टो फर्नान्डेजले बन्दुकमा पाँच गोली लोड गरिएको र बन्दुकधारीले ट्रिगर दबाएपनि बन्दुकबाट गोली भने ननिस्किएको जनाएका छन् ।