दोहा – कतारको श्रम मन्त्रालयले निजी क्षेत्रका प्रतिष्ठानमा कार्यरत कामदारका लागि इद उल फित्रको अवसरमा तीन दिने बिदा घोषणा गरेको छ ।

मन्त्रालयका अनुसार श्रम कानुनको अधीनमा रहेका निजी क्षेत्रका प्रतिष्ठानका कामदारहरूको लागि इद अल-फित्रमा दिन बिदा दिने निर्णय भएको हो ।

इदको बिदामा कामदारलाई काममा लगाउनु पर्ने भएमा श्रम कानुनको दफा (७४) मा उल्लेखित ओभरटाइम भत्तासम्बन्धी व्यवस्था लागू हुने मन्त्रालयले जनाएको छ ।

कतार लगायत खाडी मुलुकहरुमा आज सोमबार इदको पहिलो दिन हो । इदको अवसरमा दोहास्थित नेपाली दूतावास पनि तीन दिन बन्द रहने छ ।

बन्दमा अत्यावश्यक काम परे ३३६९३२९८ मा व्हाट्सएपमार्फत म्यासेज गर्न सकिने दूतावासले जनाएको छ । कतारमा हाल ३ लाख १२ हजार ६५० नेपाली कानुनी रुपमा कार्यरत छन्। जसमा ११ हजार ९० जना महिला छन् ।