काठमाडौं– श्रीलङ्कामा रहेको अमेरिकी दूतावासले राजधानी कोलम्बोमा हुने शहरव्यापी विरोध प्रदर्शन अघि ‘प्रदर्शन चेतावनी’ जारी गरेको छ ।

देशमा जारी आर्थिक संकटको विरोध गर्न कोलम्बो र शहर आसपास धेरै प्रदर्शन र र्‍यालीको आयोजना गरिएको बताइएको छ ।

‘प्रदर्शनले कोलम्बो भित्रको यात्रालाई अझ कठिन बनाउने र दिनभर सडक बन्द र ट्राफिक जाम निम्त्याउने सम्भावना छ’ अमेरिकी दूतावासले जनाएको छ ।

श्रीलङ्काले सन् १९४८ मा स्वतन्त्रता प्राप्त गरेपछिको सबैभन्दा खराब आर्थिक सङ्कटको सामना गरिरहेको छ । मुलुकमा हाल खाद्यान्न र बिजुलीको चरम अभाव रहेको बताइन्छ ।

अहिले श्रीलङ्का आफ्ना छिमेकीहरूबाट सहयोग लिन बाध्य रहेको भारतीय समाचार संस्था एएनआईले जनाएको छ । कोभिड–१९ महामारीको समयमा पर्यटन क्षेत्रमा आएको कमीका कारणले गर्दा विदेशी मुद्राको अभाव भएकाले मन्दी आएको बताइएको छ ।

यसबाट श्रीलङ्कालाई पर्याप्त इन्धन किन्न समेत धौधौ परिरहेको छ । मानिसहरूले खाद्यान्न र आधारभूत आवश्यकताहरू जस्तै इन्धन र ग्यासको तीव्र अभावको सामना गरिरहेका छन् ।