काठमाडौं- झन्डै २० जनाको समूह रुसको चौतर्फी घेराबन्दीमा परेको युक्रेनको बन्दरगाह शहर मारिउपोलस्थित एजोभस्तल स्टिल कारखानाबाट बाहिर निस्केको छ । रुसी सञ्चारमाध्यमले एजोभस्तल औद्योगिक क्षेत्रबाट २० जनालाई उद्धार गरिएको जनाएका हुन् ।

बीबीसीका अनुसार उद्धार गरिएकाहरुमध्ये अधिकांश महिला र बालबालिका छन् । एक साताअघि रुसी राष्ट्रपति भ्लादिमिर पुटिनले मारिउपोलमा रुसले विजय हासिल गरेको दाबी गरेका थिए ।

मारिउपोलका अधिकांश क्षेत्रमा कब्जा जमाएपनि रुसी फौजले एजोभस्तल क्षेत्रलाई अझै कब्जा गर्न सकेका छैनन् । एजोभस्तल क्षेत्रमा अझै पनि हजारौँ युक्रेनी सैनिकले रुसी आक्रमणको सामना गरिरहेको अन्तर्राष्ट्रिय सञ्चारमाध्यमले जनाएका छन् ।

कारखानाभित्र अझै फसेका एक हजार जनालाई मुक्त गर्ने बारेमा छलफल भइरहेको बताइएको छ ।

एक साताअघि रुसी सेनाले मारिउपोल कब्जा गरेको घोषणा गर्ने क्रममा राष्ट्रपति पुटिनले आफ्ना सैनिकहरूलाई ‘झिँगा पनि उम्किन नपाउनेगरी’ औद्योगिक क्षेत्रलाई बन्द गर्न निर्देशन दिएका थिए ।