काठमाडौं– बेलायती रक्षामन्त्री बेन वाल्लेसले रुसी राष्ट्रपति भ्लादिमिर पुटिन आफैँले बनाएको पिँजडामा फसेको टिप्पणी गरेका छन् । स्काई न्युजसँगको कुराकानीका क्रममा रक्षामन्त्री वाल्लेसले यस्तो टिप्पणी गरेका हुन् ।

उनले भने, ‘राष्ट्रपति पुटिन पहिलेजस्तो शक्तिशाली रहेनन् । उनी अहिले आफैँले बनाएको पिँजडामा छन् ।’

‘उनका सैनिक थकित छन्, उनले ठूलो हानी व्यहोरेका छन् ।’ वाल्लेसले थपे, ‘रुसको विशाल सेनाको प्रतिष्ठा गुमेको छ ।’

युक्रेनको पूर्वी एवम् दक्षिणी भूभागमा आक्रमण गर्नका लागि रुसी सैनिक अहिले पुनर्ताजगी र पुनवर्गीकरणको क्रममा रहेको उनको भनाइ छ ।

पुटिनले युक्रेनमा गरेको आक्रमणको मात्रै नभई रुसी सेनाप्रति गरेको व्यवहारको पनि परिणाम भोग्ने वाल्लेसको टिप्पणी छ ।

उनले अन्तर्राष्ट्रिय साझेदारहरु युक्रेनलाई अझ धेरै सैनिक उपकरण र ‘घातक सहायता’ सहयोग गर्न सहमत भएको समेत जानकारी दिए ।