मुम्बई(दैनिक जागरण)– हलिउड फिल्म ‘ट्रिपल एक्स: द रिटर्न अफ जेन्डर केज’ पछि बलिउड अभिनेत्री दीपिका पादुकोण पुनः एकपटक हलिउड फिल्ममा देखिने भएकी छन् । यो एक्सन ड्रामा फिल्मपछि उनी एक रोमान्टिक कमेडी फिल्ममा देखिँदैछिन् । निर्माणको प्रक्रियामा रहेको यो फिल्म क्रस कल्चरमा आधारित हुनेछ ।

हालसम्म नाम फाइनल नभइसकेको फिल्मले दुई अलग अलग संस्कृतिलाई देखाउनेछ । यो फिल्ममा दीपिका प्रमुख भूमिका निभाएसँगै उनी एसटीएक्स फिल्मसँग सहकार्य गर्दै सहनिर्माता पनि बन्दैछिन् । दीपिकाले फिल्म ‘छपाक’मार्फत फिल्म निर्माणमा पाइला चालेकी थिइन् ।

दीपिकाले यो हलिउड फिल्मको लागि स्टुडियोको टेम्पल हिल प्रोडक्सनसँग कुराकानी गरिरहेकी छन् । जसले ‘ट्वालाइट’ फ्रेञ्चाइजी र ‘द फल्ट इन आवर स्टार्स’ जस्ता फिल्म निर्माण गरेको थियो ।

दीपिकाले अर्थपूर्ण सामाग्री बनाउनका लागि आफूले प्रोडक्सनको सुरुवात गरेको बताएकी छन् । ‘एसडीएक्स फिल्मस् र टेम्पल हिल प्रोडक्सनसँग सहकार्य गर्न पाउदा रोमाञ्चित भएकी छु । उनीहरु प्रभावशाली र विविधतापूर्ण विभिन्न संस्कृतिमा समावेश कथालाई विश्वका दर्शकमाझ लैजाने प्रयास गरिरहेका छन्’, दीपिकाले भनेकी छन् ।

एसटीएक्स फिल्मस्, इरोस एसटीएक्स ग्लोबल कर्पोरेसन फिल्म डिभिजन हो । जसमार्फत फिल्मको निर्माणका अलावा वितरणको काम पनि गर्दछ ।

दीपिकाले ‘ट्रिपल एक्स: द रिटर्न अफ जेन्डर केज’ मा प्रमुख भूमिका निभाएर हलिउडमा ‘डेब्यू’ गरेकी थिइने । फिल्ममा दीपिका विन डिजलको अपोजिटमा देखिएकी थिइन् ।