काठमाडौँ– नेपाली कांग्रेसका केन्द्रीय नेता डा. शेखर कोइरालाले पार्टी सभापति शेरबहादुर देउवाले महाधिवेशनबारे दिएको अभिव्यक्तिले आफूलाई झस्काएको बताएका छन् ।

कांग्रेस सिन्धुपाल्चोकले शनिबार काठमाडौँमा आयोजना गरेको अन्तरक्रियामा बोल्दै नेता कोइरालाले सभापति देउवाको भदौ १६ गते महाधिवेशन उद्घाटन हुन्न भन्ने अभिव्यक्तिले आफूलाई झस्काएको बताएका हुन् ।

उनले सभापति देउवाको अभिव्यक्तिले कतै पार्टीको महाधिवेशन उद्घाटन पनि तरुण दलको महाधिवेशन जस्तो हुने त होइन भन्ने चिन्ता व्यक्त गरे ।

‘तरण दलको महाधिवेशन उद्घाटन भयो, त्यो महाधिवेशनले तीन जना पदाधिकारी मात्र चयन गर्‍यो ।’ डा. कोइरालाले भने, ‘अहिले पदावधी सकिँदा पनि तरुण दलमा तीन जनामात्रै पदाधिकारी छन् । पार्टीको महाधिवेशन पनि त्यस्तै हुने त होइन ?’

पार्टीको विधानमै नभएको पदाधिकारी र पूर्व पदाधिकारी बैठकले कुनै निष्कर्ष निकाल्न नसकेको सन्दर्भ दोहोर्‍याउँदै उनले पार्टीका साझा कार्यकर्तालाई भुलभुलैयामा नराख्न नेतृत्वसँग आग्रह गरे ।