काठमाडौँ– प्रधानसेनापति प्रभुराम शर्मा र अमेरिकाका राजदूत र्‍याण्डि बेरीबीच शिष्टाचार भेटवार्ता भएको छ । राजदूत बेरीले जङ्गी अड्डा पुगेर प्रधानसेनापति शर्मासँग भेटवार्ता गरेका हुन् ।

उक्त भेटवार्तामा दुई पक्षीय आपसी हित तथा पारस्परिक सम्बन्धका विषयमा छलफल भएको नेपाली सेनाले जानकारी दिएको छ । यस किसिमको भेटवार्ताले दुई देश बीचको आपसी सम्बन्धलाई सुमधुर एवं प्रगाढ बनाउन थप मद्दत पुग्ने विश्वास नेपाली सेनाले लिएको छ ।

यसैबीच आजै प्रधानसेनापति शर्मासँग संयुक्त राष्ट्रसंघीय आवासीय प्रतिनिधि सारा बेसोलो न्यान्तीले पनि भेटवार्ता गरेकी छिन् । राष्ट्रसंघीय आवासीय प्रतिनिधि न्यान्तीले आज जङ्गी अड्डामा पुगेर शिष्टाचार भेटवार्ता गरेकी हुन् ।

भेटवार्तामा उनीहरुबीच संयुक्त राष्ट्रसंघमा नेपाली सेनाको सहभागिता लगायत अन्य द्विपक्षीय महत्वको विषयहरुमा छलफल भएको नेपाली सेनाले जानकारी दिएको छ ।

तस्वीर- नेपाली सेना