मुम्बई(बलिउड हंगामा)– व्यापारी पति राज कुन्द्रा पोर्नोग्राफी मुद्धामा फसेपछि अभिनेत्री शिल्पा शेठ्ठीले उनलाई छोड्ने मनस्थिति बनाएकी छन् । यो कुराको पुष्टि उनका नजिकका साथीले गरेका छन् ।

उनको एक साथीका अनुसार दुई सन्तानलाई सँगै लिएर राजलाई छोड्ने मनस्थिति शिल्पाले बनाएकी छन् । ‘राज कुन्द्रामाथिको समस्या दिनका दिन बढिरहेको छ । पति राज पोर्नोग्राफी मुद्धामा जोडिएपछि हामीलाई भन्दा बढी चिन्ता अहिले शिल्पालाई छ । शिल्पाले हिराहरु र घरको सम्पत्ति कुनै आपराधिक श्रोतबाट राजले पाए भन्ने सुराकी पाउन सकेकी छैनन्’, ती साथीले भनेकी छन् ।

शिल्पा आफ्ना सन्तानलाई पति राजले गलत शैलीबाट कमाएको सम्पत्तिबाट टाढा राख्न चाहिन्छन् । ‘शिल्पाले अब कुन्द्राको सम्पत्तिलाई कुनै पनि हालतमा नछुने अडान लिइसकेकी छन् । उनले रियालिटी शोबाट आफूलाई चाहिने पैसा कमाइसकेकी छन् । उनी फिल्मबाट स्थापित भइसकेकी छन् । त्यसकारण पनि फिल्म ‘हंगामा २’ र रिलिज नभएको ‘निकम्मा’ पछि अन्य फिल्ममा पनि जोडिन चाहेकी छन्’, शिल्पाकी साथीले भनेकी छन् ।

शिल्पालाई निर्देशक अनुराग बसु र प्रियादर्शनले आफ्नो फिल्ममा अभिनय गराउने वचनबद्धता व्यक्त गरिसकेका छन् ।