काठमाडौं– अभिनेता सौगात मल्ल, बुद्धि तामाङ र अभिनेत्री दिया पुन स्टारर फिल्म ‘मन्त्र’को रिलिज मितिसहित पोस्टर सार्वजनिक भएको छ । कोरोना महामारी र लकडाउनका कारण फिल्म प्रदर्शनमा ढिलाई भइरहँदा आगामी माघ २८ गतेलाई यसले प्रदर्शन मिति तोकेको हो ।

गोर्खा सिरानचोक एण्ड लिगलिग कोट फिल्मस् को ब्यानरमा बनेको फिल्मका वितरक गोविन्द शाही हुन् । खिलबहादुर गुरुङ निर्देशित फिल्मको फस्टलुकमा सौगात मल्ल, बुद्धि तामाङ र दिया पुनलाई स्थान दिइएको छ । फिल्म गोरखाको मनास्लु क्षेत्र आसपासको कथावस्तुलाई आधार बनाएर निर्माण गरिएको हो । फिल्ममा दर्शकले गोरखाको चुम नुब्री सामा गाउँ, वीरेन्द्र ताल र पुङ्गिन गुम्बालगायतका रमणीय दृश्यहरु हेर्न पाउनेछन् ।

फिल्ममा नमिता घिसिङ, वीरबहादुर लामा, पासाङ टि शेर्पाको पनि अभिनय छ । देवेन्द्र मानन्धर कार्यकारी निर्माता रहेको फिल्ममा रविराज कार्की, सुरेश कार्की र सुभ श्रेष्ठको लगानी छ । साम्तेन भुटियाले लेखेको फिल्ममा सन्तोष सुनारको संगीत, संजय लामाको छायांकन, मित्र डि गुरुङको सम्पादन, सुजिल कर्माचार्यको पाश्र्व संगीत रहेको छ ।