काठमाडौँ- लगातारको वर्षाका काठमाडौंको फोहोर नियमित उठ्न सकेको छैन । अहिले शहरका सडक पुल र चोकमा फोहोरको डंगुर थुप्रिएका देखिन्छन् ।

काठमाडौं महानगरपालिकाले विगत १६ वर्षदेखि उपत्यकामा उत्सर्जित फोहोरमैलाको अन्तिम विर्सजनस्थल नुवाकोट जिल्लाको ककनी गाउँपालिका वडा नम्बर २ स्थित ल्याण्डफिल साइटमा विर्सजन गर्दै आइरहेको छ ।

ल्याण्डफिल साइटको करिब २ किलोमिटर सडक पार गर्न नसक्दा काठमाडौंबाट फोहोर बोकेर गएका गाडीहरु १५ दिनदेखि ल्याण्डफिल सडकमै अलपत्र अवस्थामा छन् ।

सडकमाथि फोहोर र फोहोरमाथि फोहोर बोेकेका गाडी फोहोरको थुप्रो र हिलोमा फसेर बसेका छन् ।

सामान्य अवस्थामा दैनिक डेढ देखि दुइ सय गाडीले काठमाडौंको फोहोर ल्याण्डफिल साइट पुग्थे भने अहिले मुस्किलले दिनमा ५० वटा सम्म पुग्ने गरेका छन् ।

अहिले सिसडोल फोहोरको पहाड बनेको छ । अझैं पनि उपत्यकाको फोहोर ल्याण्डफिलमै विर्सजन भइरहेको छ ।

उता दीर्घकालीन ल्याण्डफिल साइट बञ्चरे डाँडाको निर्माण अझैं सम्पन्न भएको छैन । सिसडोलबाट २ किलोमिटर पर रहेको बञ्चरे डाँडामा २५ वर्षका लागि फोहोर बिर्सजन गर्न मिल्ने महानगरका अधिकारीहरु बताउँछन् ।