काठमाडौं–सौरभ राईले निर्देशन गर्न लागेको फिल्म ‘गुराँस’ले नेदरल्यान्डको स्क्रिप्ट डेभलपमेन्ट फन्डअन्तर्गत १० हजार यूरो रकमको हुबर्ट बल्स फण्ड जितेको छ ।

नेपाल र भारतको संयुक्त निर्माण रहने फिल्मलाई नेपालमा आइसफल प्रोडक्सनले निर्माण गर्दैछ ।

आइसफल प्रमुख रामकृष्ण पोखरेलले फिल्मले १४ लाख बराबर रकम प्राप्त गरेको बताए । हुबर्ट बल्सले ‘गुराँस’सँगै ब्राजिल, थाइल्यान्ड, कजाकस्तानलगायत १० देशका फिल्मलाई फन्ड उपलब्ध गराएको हो ।

कालिम्पोङ मुलथलो भएको नेपालीभाषी सौरभको यो दोस्रो फिचर फिल्म हो । यसअघि उनले निर्देशन गरेको ‘निम्तो’ले ‘मुम्बई फिल्म फेस्टिभल’को सबैभन्दा ठूलो पुरस्कार ‘ग्रान्ड प्राइज’जितेको थियो । यो फिल्मको वल्र्ड प्रिमियर नेदरल्यान्डको प्रतिष्ठित फिल्म फेस्टिभल रोट्रेड्याममा भएको थियो ।

योभन्दा अघि उनले बनाएको सर्ट फिल्म ‘गुँड’ क्यान्सको सिने फाउन्डेसनमा छनोट भएको थियो । निर्माता पोखरेलले फिल्ममा दुई वर्षदेखि काम भइरहेको र हुबर्ट बल्सको फन्डसँगै यसले गति पाउने बताए ।

फिल्ममा आइसफलसँगै क्राउलिङ एन्जलको पनि निर्माण साझेदारी रहनेछ । यो बाहेक संजय गुलाटी पनियो फिल्मको निर्माणमा साझेदार रहनेछन् ।

आइसफलले यसअघि निर्माण गरेको ‘ऐना झ्यालको पुतली’प्रदर्शनको पर्खाइमा छ । सुजित बिडारीको निर्देशन रहेको यो फिल्म दक्षिण कोरियाको बुसानको मुख्यप्रतिस्पर्धामा छनोट भएको थियो ।