पोखरा– गण्डकी प्रदेशको कास्की जिल्ला र पूर्वी नवलपरासी जिल्लामा निषेधाज्ञा थप गरिएको छ । कोरोना संक्रमण बढ्दै गएको भन्दै दुवै जिल्लामा तेस्रो पटक निषेधाज्ञा थप गरिएको हो ।

दुवै जिल्लामा दोस्रो पटक थप गरी जेठ १४ गते राति १२ बजेसम्म निषेधाज्ञा लागू गरिएको थियो ।

नयाँ भेरिएन्टसहितको कोरोना संक्रमण झनै तीब्र रुपमा फैलिएको भन्दै निषेधाज्ञा थप गरिएको कास्की जिल्ला प्रशासनले जनाएको छ ।

जिल्ला कोभिड व्यवस्थापन केन्द्रको बिहीबारको बैठकले निषेधाज्ञा थप गर्ने निर्णय गरेको थियो । कास्कीमा वैशाख १५ गतेदेखि निषेधाज्ञा जारी गरिएको थियो । शुक्रबारदेखि थप गरिएको निषेधाज्ञा केही कडाई गरिएको छ ।

अत्यावश्यक खाद्य सामग्री खरिद बिक्रीका लागि बिहान ९ बजेसम्म खुला रहने तथा खाद्यान्न, तरकारी, पानी, फलफूल, दूध लगायतका दैनिक उपभोग्य वस्तु वस्तु खरिदका लागि सवारी साधन प्रयोग गर्न नपाइने प्रशासनले जनाएको छ ।

विवाह, ब्रतबन्ध होटल तथा पार्टी प्यालेसमा गर्न पनि पूर्ण रुपमा रोक लगाइएको छ ।

उद्योग तथा सार्वजनिक निर्माण काममा संलग्न कर्मचारी तथा श्रमिकलाई उद्योग परिसर वा निर्माणस्थल नजिकै खाना बस्नको प्रवन्ध गर्नुपर्ने आदेशमा भनिएको छ ।

यस्तै, पूर्वी नवलपरासी जिल्लामा पनि शुक्रबार राती १२ बजेदेखि आगामी जेठ २४ गते राती १२ बजेसम्म निषेधाज्ञा थप गरिएको छ ।

बिहीबार बसेको डिसिसिएमसीको बैठकले जेठ २४ गते राति १२ बजे सम्मका लागि निषेधाज्ञा थप गर्ने निर्णय गरेको प्रमुख जिल्ला अधिकारी मनमायाँ पंगेनीले बताइन् ।