काठमाडौं– शिक्षक बन्ने सपना साँचेका एक युवाको कथा समेटिएको फिल्म ‘प्रकाश’को सम्पूर्ण छायांकन पुरा भएको छ । अभिनेता प्रदीप खड्काको प्रमुख भूमिकामा अभिनय रहेको फिल्म युनिटले जुम्लामा ४२ दिनमा सुटिङ पुरा गरेको हो ।

दिनेश राउत निर्देशित फिल्ममा प्रदीपको अपोजिटमा रेनु योगी छिन् । रेनुले यसै फिल्ममार्फत फिल्मी अभिनयमा पाइला चालेकी हुन् ।

फिल्ममा दीया मास्के, प्रकाश घिमिरे, राजन खतिवडा, रामबाबु रेग्मी, निरज पन्थी‘आँपे’, हुम विसी, प्रशान्त श्रेष्ठ, गोविन्द सुनवार, दीपेन्द्र शाही लगायतका कलाकारको पनि अभिनय रहेको छ ।

निर्देशक राउतले निम्न वर्गीय परिवारमा हुर्किएको एक युवकले सरकारी स्कूलको शिक्षक बन्न गर्ने संघर्षको कथालाई फिल्ममा देखाइने बताए ।

विनिश इन्टरटेनमेन्टको ब्यानरमा बनेको फिल्ममा महेन्द्र अधिकारीको लगानी छ ।

फिल्ममा राजेश श्रेष्ठको छायांकन, विकास सुवेदीको कथा, ,अनुप बरालको कास्टिङ डाइरेक्सन र ताराप्रकाश लिम्बु, एलिस कार्की, दीपक शर्माको संगीत छ ।