चितवन– तेस्रो संस्करणको ‘मिस्टर एण्ड मिस थारु २०२१’ को उपाधि क्रमशः प्रशान्त हुजदार र लिभा चौधरी थारुले जितेका छन् ।

१४ जना प्रतिस्पर्धीलाई पछि पार्दै प्रशान्तले उपाधि जितेका हुन् । सप्तरी निवासी प्रशान्तलाई ‘मिस्टर थारु २०१८’ का विजेता रविन चौधरीले ढाका टोपी लगाइदिए । यस्तै पर्साका रवी चौधरी ‘फस्ट रनरअप’ र मोरङका आशकुमार चौधरी ‘सेकेण्ड रनरअप’ भए ।

रवीलाई ‘मिस्टर थारु २०१८’ का ‘फस्ट रनरअप’ विवेक चौधरी र आशकुमारलाई ‘मिस्टर थारु २०१८’ का सेकेण्ड रनरअप दीपेन चौधरीले अवार्ड प्रदान गरे ।

विधागततर्फ विजय चौधरी ‘बेस्ट फोटोजेनिक’, प्रशान्त हुजदार ‘बेस्ट ट्यालेन्ट’, हरेन्द्रकुमार चौधरी ‘बेस्ट कल्चरल रिप्रेजेन्टिटिभ’, कमलकुमार चौधरी ‘बेस्ट डिसिप्लिन’, अविनाश महतो ‘बेस्ट वाक’, भागवती चौधरी ‘खल्ती पब्लिक च्वाइस’ र सिद्धान्त चौधरी ‘बेस्ट पर्सानालिटि’ बने ।

‘मिस थारु’ तर्फ उदयपुर निवासी लिभाले चितवनको खैरहनीमा सम्पन्न ग्राण्ड फिनालेमा १६ जना प्रतिस्र्धीलाई पछि पार्दै उपाधि जितेकी हुन् । उनलाई दोस्रो संस्करणकी ‘मिस थारु’ आकृति चौधरीले ताज पहराइदिइन् ।

प्रतियोगितामा सुनसरीकी श्रुति गच्छदार ‘फष्ट रनरअप’, सुनसरीकै लक्ष्मी चौधरी ‘सेकेण्ड रनरअप’ बने । श्रुतिलाई ‘मिस थारु २०१८’ की ‘फष्ट रनरअप’ सुनेश्वरीकुमारी दास र लक्ष्मीलाई ‘मिस थारु २०१८’ की ‘सेकेण्ड रनरअप’ आश्मा चौधरीले ताज पहिराइ दिइन् ।

विधागततर्फ नेहा चौधरी ‘बेस्ट फोटोजेनिक’, प्रतिभा चौधरी ‘बेस्ट ट्यालेन्ट’, सोनु चौधरी ‘बेस्ट कल्चरल रिप्रेजेन्टिटिभ’, लिभा चौधरी थारु ‘बेस्ट डिसिप्लिन’, प्रतिभा चौधरी ‘बेस्ट वाक’ र श्रुति गच्छदार ‘खल्ती पब्लिक च्वाइस’ तथा ‘बेस्ट पर्सानालिटि’ बने ।

प्रतियोगिताको विजेताले नगद ५० हजार, ‘फस्ट रनरअप’ले ३० हजार, ‘सेकेण्ड रनरअप’ले २० हजार र विभिन्न उपहारहरु प्राप्त गरे ।

उनीहरुलाई मुख्य निर्णायक ‘मिस नेपाल वल्र्ड २०१९’ अनुस्का श्रेष्ठ, आयोजक जह इन्टरटेनमेन्टका प्रमुख कार्यकारी अधिकृत सुरेश चौधरी, वाइएसी इभेन्ट्सका म्यानेजर जयस चौधरीलगायत अतिथिले पुरस्कार प्रदान गरे ।

थारु समुदायको उत्थान र कलासंस्कृतिको संरक्षणका लागि जह इन्टरटेनमेन्टको आयोजनामा सन् २०१७ देखि मिस्टर एण्ड मिस थारुको सुरुवात भएको हो ।