काठमाडौँ– कोरोनाविरुद्धको खोप अभियानलाई तीव्रता दिएको सरकारले थप ५० लाख डोज खोप खरिद गर्ने तयारी गरेको छ ।

स्वास्थ्य तथा जनसंख्या मन्त्रालयले आइतबार प्रधान सम्पादकसँगको अन्तरक्रियामा मन्त्रालयका सचिव लक्ष्मण अर्यालले सरकारले थप ५० लाख डोज खोप खरिद गर्ने तयारी गरेको जानकारी दिएका हुन् ।

सरकारले पहिलो प्राथमिकताको खोप अभियान पूरा गरी फागुन २३ गतेदेखि दोस्रो प्राथमिकतामा परेकाहरुलाई खोप लगाउने जनाएको छ ।

गत माघ ८ गते भारतले १० लाख डोज खोप अनुदानमा उलब्ध गराएको थियो भने सरकारले २० लाख डोज खोप खरिद गरी १० लाख डोज नेपाल ल्याइसकेको छ । बाँकी रहेको १० लाख डोज खोप पनि आउने क्रममा छ। सरकारले प्रति डोज ४ डलरमा २० लाख डोज खोप खरिद गरेको हो ।

यसअघि भारतको सेरम इन्स्टिच्युटबाट खोप खरिद गरेको सरकारले अब पनि सेरमबाट नै खोप खरिद गर्ने तयारी भइरहेको छ ।

कोरोना भाइरस विरुद्धको खोप अभियानमा दोस्रो प्राथमिकतामा ५५ वर्ष माथिका नागरिकहरु, ४० देखि ५४ वर्ष उमेर समूहमध्ये तोकिएका दीर्घ रोग भएका व्यक्तिहरु र तोकिएका दीर्घरोगी प्रवासि कामदार र शरणार्थीहरुलाई खोप लगाउने लक्ष्य लिएको छ ।

यस्तै, कोभ्याक्समार्फत पनि करिब १ करोड ३० लाख डोज खोप नेपाल भित्रिदै छ । पहिलो खेपअन्तर्गत केही दिनमा नै १९ लाख खोप आउने भएको छ ।

चीन सरकारले पनि ५ लाख डोज खोप सहयोग गर्ने निर्णय गरिसकेकाले उक्त खोप पनि आउने तयारी भइरहेको सचिव अर्यालले जानकारी दिए ।