मुम्बई(बलिउड हंगामा)– सन् २००५ मा रिलिज अनिस बज्मीको सुपरहिट कमेडी ड्रामा फिल्म ‘नो इन्ट्री’को सिक्वेल बन्ने भएको छ । सलमान खान, फरदीन खान, अनिल कपूर, विपाशा बसु र लारा दत्त स्टारर ‘नो इन्ट्री’को सिक्वेल ‘नो इन्ट्री मे इन्ट्री’को तयारी सुरु भइसकेको छ ।

सिक्वेलमा सलमान, फरदीन र अनिल प्रमुख भूमिकामा अभिनय गर्ने भए पनि अभिनेत्रीको छनोट भने भइसकेको छैन । फिल्ममा कमेडीको सिक्वेन्स अघिल्लो फिल्मभन्दा नौ गुणा बढी हुने निर्माण पक्षले जनाएको छ ।

फिल्ममा सलमान, अनिल र फरदीन ट्रिपल भूमिकामा हुनेछन् । जसकारण फिल्ममा नौ अभिनेत्री देखिनेछन् । बलिउडमा हालसम्म प्रयोग नभएको विषय यसमा प्रयोग गरिने निर्माण पक्षको दाबी छ । फिल्ममा लारा दत्त, इशा देओल र सेलिना जेटली पनि हुनेछन् ।

टी–सिरिज प्रमुख भूषण कुमार आफ्ना ‘कबीर सिंह’ निर्माता मुराद खेतानीसँग मिलेर यो फिल्म बनाउदैछन् । फिल्मको सुटिङ आगामी वर्षको सुरुदेखि हुनेछ ।