काठमाडौँ– विराटनगरका लागि उडेको बुद्ध एयरको विमान त्रिभुवन अन्तर्राष्ट्रिय विमानस्थलमा फर्किएको विषयमा बुद्ध एयरले औपचारिक धारणा सार्वजनिक गरेको छ ।

सोमबार बिहान सवा ८ बजे त्रिभुवन अन्तर्राष्ट्रिय विमानस्थलबाट विराटनगरका लागि उडेको विमान त्यहाँ अवतरण गर्न नसकेपछि काठमाडौँ फर्किएको थियो । काठमाडौँमा नर्मल अवतरण गरेको सो विमानमा ल्याण्डिङ गियर इन्डिकेटरमा समस्या देखिएको बुद्ध एयरले जनाएको छ।

एक विज्ञप्ति जारी गर्दै उसले ल्याण्डिङ गियर झरेको संकेत दिने दुईवटा इन्डिकेटर हुने र त्यसमध्ये एउटाले संकेत नदिएपछि विमान विराटनगरमा अवतरण नगरी काठमाडौँ फर्काइएको जनाएको छ । सुरक्षित हवाई निर्देशिका अनुसार नै विमान काठमाडौँ फर्काइएको र इन्धन सक्न आकाशमा फन्को मारेको बताएको छ ।

काठमाडौँमा अवतरण गर्दा ल्याडिङ गियर झरेको यकिन गरिएकोसमेत बताएको छ ।