मुम्बई(एबीपी लाइभ)– ओटीटी प्लेटफर्म जी५मा आगामी साता फिल्म ‘हेलमेट’ रिलिज हुँदैछ । फिल्मको ट्रेलर निकै हसाउने र रमाइलो किसिमको छ ।

फिल्मको कथा कण्डम किन्ने र यसको प्रयोग कसरी गर्ने भन्ने विषयमा आधारित छ । फिल्ममा अपारशक्ति खुराना, आशिष वर्मा, अभिषेक बनर्जी, प्रनूतन बहल र अरुनिता झाको अभिनय छ ।

फिल्मको प्रमोसनमा व्यस्त अपारशक्ति र अभिषेकले एक अन्तरवार्तामा वास्तविक जीवनमा कण्डमसँग जोडिएको अनुभव सुनाएका छन् । अपारशक्तिका अनुसार कलेज जीवनमा उनी हेलमेट लगाएर कण्डम किन्न जान्थे ।

‘हेलमेट लगाएर कण्डम किन्नु सजिलो हुन्छ । हेलमेट लगाएर कण्डम किन्थें र छिटो छिटो निस्कन्थें । चण्डीगढमा सबैले मलाई चिन्थे । त्यही भएर मलाई हेलमेट लगाएर कण्डम किन्नु बाध्यता थियो । ट्रेलर हेरेपछि धेरैले मलाई सन्देश पठाएर वास्तविकता यही नै हो भनेका थिए । आशा छ यो फिल्म रिलिज पछि यस्तो हुनेछैन’, अपारशक्तिले भनेका छन् ।

अभिषेक भने कण्डम आफ्नो तन्नामुनी राखेर सुत्थे । तर एकदिन त्यो कण्डम उनका पिताले भेट्टाएका थिए ।

अभिषेकलाई चाहिँ कण्डम किन्नु भन्दा पनि त्यसलाई कसरी राख्ने भन्ने बारेमा तनाव हुन्थ्यो । त्यही कारण उनी आफ्नो झोलामा कण्डम राख्थे । तर उनको झोलामा आमाले हेर्ने भएकाले उनी ओछ्यानको तन्ना मुनी राख्थे । ‘एक दिन तन्नामुनी मैले कण्डम भेटिनँ । घरमा म, बुवा र आमा मात्र थियौं । त्यसकारण कण्डम कहाँ गयो भनेर सोध्ने हिम्मत गरिनँ । मैले त्यो कण्डम बुवाको सेक्रेट आरमालीमा ६ महिनापछि भेटेको थिएँ’, अभिषेकले खुलाएका छन् ।