काठमाडौँ– नेपाली काँग्रेसका जिल्ला सभापतिहरुले क्रियाशील सदस्यता तत्काल सार्वजनिक गर्न माग राख्दै पार्टी केन्द्रीय कार्यालय सानेपामा धर्ना बसिरहेका बेला वरिष्ठ नेता रामचन्द्र पौडेलले पनि सो धर्नामा सर्मथन जनाएका छन् । सो धर्नालाई समर्थन जनाउन पौडेल बुधबार सानेपा जाने भएका छन् । दिउँसो २ बजे पौडेल सानेपा जाने उनी निकट नेताहरुले जानकारी दिएका छन् ।

क्रियाशील सदस्यता तत्काल सार्वजनिक गर्न र जिल्ला सभापतिको निर्वाचन सबै जिल्लामा एउटै प्रक्रियामा गर्नुपर्ने माग राख्दै अधिकांश जिल्ला सभापतिहरु आन्दोलित भएका छन् । विशेषतः पौडेल समूहका जिल्ला सभापतिहरु धर्नामा बसेका छन् ।

आफू निकट जिल्ला सभापतिहरु धर्नामा बसेपछि बुधबार बिहान पौडेल समूहको बैठक पूर्वमहामन्त्री प्रकाशमान सिंहको निवास चाक्सीबारीमा बसेको थियो । सो बैठकले जिल्ला सभापतिहरुको धर्नालाई समर्थन जनाउने निष्कर्ष निकालेको थियो ।