सल्यान– सल्यानमा कोरोना संक्रमणबाट मृत्यु भएकाको शव व्यवस्थापनमा महिला सैनिक खटिएका छन् ।

कोभिड–१९ को सङ्क्रमणबाट जिल्ला अस्पताल सल्यानमा मृत्यु भएका बागचौर नगरपालिका ७ का ६८ वर्षीय पुरुषको शव व्यवस्थापन महिला सैनिकको टिमले गरेको हो ।

सल्यानमा अवस्थित सबुज गणमा कार्यरत सहसेनानी श्वेता पौडेलको नेतृत्वमा शव व्यवस्थापनमा महिला सैनिक टोली खटिएको थियो । जिल्लामा सङ्क्रमित मृतकका शव व्यवस्थापनमा पहिलो पटक महिला सैनिक खटिएको गणले जनाएको छ ।

गणपति कञ्चनकृष्ण बस्नेतले सैनिक नियम अनुसार शव व्यवस्थापनमा तालिम दिएर महिला सैनिक परिचालन गरेको जानकारी दिए । सोही गणले शारदा नगरपालिकाको आर्थिक सहयोगमा २५ शय्याको आइसोलेशन निर्माण अन्तिम चरणमा पुगेको जनाएको छ ।