काठमाडौँ– महानगरीय प्रहरी परिसर टेकुमा मंगलवार खोप लगाउने विषयमा विवाद हुँदा लाइनमा बसेका प्रहरीले नै कोरोना विरुद्धको खोप लगाउन पाएनन् ।

चिनियाँ खोप ‘भेरो सेल’ को पहिलो डोज नलगाएका र भारतीय खोप ‘कोभिशिल्ड’ को (केही बाँकी भएको खोप) दोस्रो डोज लगाउन प्रहरी कर्मचारी बिहानैदेखि लाइनमा बसेका थिए । तर प्रहरी अधिकृतहरुले आफ्ना नातागोता, इष्टमित्रलाई खोपका लागि बोलाएपछि खोप नपुग्ने भन्दै विवाद भएको थियो ।

विवादपछि साढे ३ घण्टा बढी लाइनमा बसेका प्रहरी कर्मचारीले खोप नै लगाउन पाएनन् । स्वास्थ्य मन्त्रालयले खोप नै उपलब्ध नगराएको भनेर सबैलाई फर्काइयो ।

सरकारले खोपका लागि चिकित्सक, सुरक्षा निकायमा काम गर्ने व्यक्ति, पत्रकारलगायत अग्रमोर्चामा खटिएर काम गर्नेलाई खोपको प्राथमिकतामा राखेको छ । तर प्रहरीले भने अझै खोप लाउन पाएका छैनन् ।