मुम्बई(बलिउड लाइफ)– बलिउड अभिनेता विकी कौशल र अभिनेत्री कटरीना कैफको विवाहको खबरले उनका फ्यानहरु निकै खुशी छन् । उनीहरुले आधिकारिक रुपमा आफ्नो विवाहको बारेमा नबताए पनि विवाहको लोकेसनदेखि विवाहमा बोलाइएका पाहुनासम्मको नाम सार्वजनिक भइरहेको छ ।

उनीहरु डिसेम्बर ७ देखि ९ का बीच राजस्थानको सवाई माधोपुरको सिक्स सेन्सेस फोर्टमा विवाह गर्दैछन् । समाचारअनुसार विकी र कटरीनाले राजस्थानभन्दा अघि मुम्बईमा विवाह गर्नेछन् । उनीहरु राजस्थानमा विवाह गर्नु अघिल्लो साता मुम्बईमा कोर्ट म्यारिज गर्दैछन् ।

कोर्ट म्यारिजपछि उनीहरु जयपुर जानेछन् । जहाँबाट उनीहरु विवाहस्थल सवाई माधोपुर पुग्नेछन् । दुवै विवाहका लागि उनीहरुले तयार सुरु गरिसकेका छन् ।

विवाहका लागि कटरीनाले आफ्नो कामबाट ‘ब्रेक’ लिइसकेकी छन् । उनी अहिले विकी र उनको परिवारसँग निरन्तर सम्पर्कमा छिन् । कटरीनालाई विकीकी आमा वीणा कौशल र भाई सनी कौशलले सहयोग गरिरहेका छन् ।