काठमाडौँ– एभरेष्ट प्रिमियर लिग क्रिकेट ईपीएलमा पोखरा राइनोजले सुखद् नतिजा निकाल्ने लक्ष्य लिएको छ ।

टिमले बिहीवार राजधानीमा पत्रकारसम्मेलन गर्दै टिमको तयारी अन्तिम चरणमा पुगेको पनि जनाएको छ । बजाज पल्सर ईपीएलका लागि राइनोजले आफ्ना प्रायोजक, खेलाडीहरु र खेल रणनीतिका बारेमा जानकारी गराएका हो ।

जम्प नेशनको स्वामित्वमा रहेको राईनोजले प्रतियोगितालाई आफ्नो पक्षमा पार्नका लागि विभिन्न रणनीति तय गरेको छ ।

विगतमा पोखराले गरेको प्रदर्शनको समिक्षा गर्दै सुखद् नतिजाका लागि यसपटक मुख्य प्रशिक्षक, बलिङ्ग प्रशिक्षक र फिल्डिङ्ग प्रशिक्षकलाई चयन गरेको पनि जनाएको छ ।

राईनोजले नेपाली मार्की खेलाडी राष्ट्रिय टोलीका विनोद भण्डारीको नेतृत्वमा विदेशी खेलाडीलाई पनि समावेश गरेको छ ।

जसमा दक्षिण अफ्रिकाका रिचार्ड अन्स्ट लेभी जसले विश्व कपमा प्रदर्शन गरिसकेका छन् । यस्तै वेष्ट ईन्डिजका केसरिक विलियम, श्रीलङ्काका असेला गुणरत्ने र साहान अरचसिगेलाई टिममा समावेस गरेको छ ।

प्रतियोगिताको रणनीतिको बारेमा मार्की खेलाडी भण्डारीले राईनोज प्रतियोगितालाई आफ्नो पक्षमा पार्ने रणनीतिका साथ मैदान उत्रने बताए ।

‘प्रतियोगिता हो जित हार हुन सक्छ तर टिम विजयी हुने लक्षका साथ मैदानमा उत्रने छ’ भण्डारीले भने ।