काठमाडौँ— नेपाली काङ्ग्रेसका केन्द्रीय सदस्य प्रदीप पौडेलले केपी शर्मा ओलीविरुद्ध अब अविश्वासको प्रस्ताव ल्याउन ढिला गर्न नहुने बताएका छन् ।

रिपोर्टस क्लब नेपाल लुम्बिनी प्रदेश कार्यालयले बुटवलमा आयोजना गरेको साक्षात्कारमा बोल्दै पौडेलले ओली श्री ३ जंगबहादुर भन्दा पनि बलियो बन्न खोजेको आरोप लगाउँदै अब ओलीविरुद्ध अविश्वासको प्रस्ताव ल्याउन ढिला गर्न नहुने बताएका हुन् ।

नेता पौडेलले ओली पूर्ण रुपमा असफल भएको बताउँदै प्रधानमन्त्री ओलीले देश निर्माण, नेपाली जनताको समस्याहरू समाधान गर्नुको साटो आफू र आफ्ना आसेपासेहरूलाई मात्र खुसी पारेको तर्क गरे । पौडेलले ओलीमा अहंकार, दम्भ बढेको भन्दै ओलीको विकल्प नखोजे मुलुकमा अस्थिरता बढ्ने, मुलुकको संरचनाहरु सबै कब्जा हुने समेत बताए ।

त्यस्तै कार्यक्रममा बोल्दै नेकपा माओवादीका नेता वामदेब क्षेत्रीले ओली दुई जिब्रे भएको तर्क गरे । क्षेत्रीले लुम्बिनी प्रदेशमा भएको घटनामा पैसाको चलखेल भएको दाबी गरे ।