काठमाडौं– एभरेष्ट सूर्य बोहोराको लेखन र निर्देशन रहेको फिल्म ‘हेल्लो जिन्दगी’को पहिलो झलक सार्वजनिक भएको छ । सत्यघटनामा आधारित सामाजिक कथाको यो फिल्म आगामी चैत ११ गते रिलिज हुँदैछ ।

फिल्ममा विक्रम डि जोशी, प्रियंका कार्की, दीपिका प्रसाईं, एभरेष्ट सूर्य बोहोरा, विल्सनविक्रम राई, विक्रान्त बस्नेत, सबिता गुरुङ, सनमकुमार बैराग, जानकी पन्त (जुन), ध्रुव दत्त, कुमुद पन्तलगायतका कलाकारको अभिनय छ ।

युके र नेपालमा छायांकन गरिएको फिल्मको निर्मातामा हिराल जोशी र विक्रम डि जोशी छन् । सिर्जना जोशी महर्जन कार्यकारी निर्माता रहेको फिल्मको कथ निर्देशक बोहोरा र विक्रमको हो भने पटकथा र संवादमा निर्देशक बोहोरालाई अभिमन्यु निरवीले साथ दिएका छन् ।

निर्देशक बोहोराकै शब्द रहेको फिल्ममा राजनराज शिवाकोटी र एलिस कार्कीको संगीत छ । प्रमोद खरेल, प्रताप दास, प्रविशा अधिकारी, एड्रिन प्रधान र रजिना रिमालको स्वरमा रहेको गीतमा बिष्णु देवाको कोरियोग्राफी छ । आरआर फिल्मस्ले बितरण गर्ने फिल्मको डिजिटल राइटस् ओएसआर डिजिटलले लिएको हो ।

महारानी इन्टरटेन्मेन्ट युके र एभरेष्ट सूर्य बोहरा फिल्मसको सहकार्यमा वीरञ्जना इन्टरटेन्मेन्टको प्रस्तुति रहेको फिल्ममा सबिता गुरुङ सह–निर्माता छिन् । फिल्ममा पुरुषोत्तम प्रधानको छायांकन, सम्राट बस्नेतको द्वन्द्व र मित्र डि गुरुङको सम्पादन छ ।