दोहा– नेपालीहरुको प्रमुख श्रम गन्तब्य रहेको कतारले अवैध भएका नेपाली कामदारलाई रोजगारदाता कम्पनी खोजेर काम गर्न पाउने मौका दिएको छ ।

कम्पनी अन्तर्गत कार्य (वर्किङ भिसा)मा कतार आएपछि कम्पनीले आईडी नदिएको वा विभिन्न कारणले आईडी नविकरण हुन नसकी कानूनी हैसियत गुमाएका नेपालीले कम्पनी खोजेर काम गर्न पाउने दोहास्थित नेपाली दूतावासले जनाएको छ ।

दूतावासका अनुसार कुनै पनि रोजगारदाता कम्पनीबाट जब अफर लेटर लिई आवश्यक कागजात सहित कतारको आन्तरिक मन्त्रालयले तोकेको केन्द्रहरुमा गई निवेदन पेश गरी हालसम्मको दण्ड जरिवाना छुट तथा सजाय मिनाहा गरी रोजगारदाता कम्पनीमा कागजात नियमित गर्न सकिने जनाएको छ ।

यसरी रोजगारी सुनिश्चित नभएको हकमा स्वदेश फिर्ति सहजीकरणका लागि सर्च एन्ड फलो अप डिपार्टमेन्टको काउन्टरमा नेपाल फर्कने टिकटको बुकिङ लिएर गएमा दण्ड जरिवाना छुट तथा मिनाहा गरि स्वदेश फर्कन पाइने दूतावासले जनाएको छ ।

जुनसुकै प्रकारका भिसा जस्तै, भिजिट तथा फेमेली भिसामा कतार आएका तर, भिसाको म्याद समाप्त भई कतार बसाई अवैध भएकाहरुको हकमा समेत सर्च एन्ड फलो अप डिपार्टमेन्टको काउन्टरमा नेपाल फर्कने टिकटको बुकिङ लिएर गएमा दण्ड जरिवाना छुट तथा मिनाहा गरि स्वदेश फर्कन दिइने मन्त्रालयले जनाएको छ ।

कतार सरकारले जारी गरेको यो घोषणा डिसेम्बर ३१ अर्थात २०७८ पौष १६ गते सम्म लागू हुने भएकाले उल्लेखित अबधिमा यस अवसरको सदुपयोग गरी तोकिएको कानुनी कारबाहीबाट बाच्न कतारमा रहेका सबै नेपालीलाई दूतावासले अनुरोध गरेको छ ।

कतारले अवैध कामदारलाई कम्पनी खोजेर काम गर्न दिने निणर्य गरेसँगै यहाँ अवैध रुपमा बसेका थुप्रै नेपाली कामदारहरु लाभान्वित हुने अपेक्षा गरिएको छ । दूतावासका अनुसार कतारमा अहिले ३ लाख १२ हजार ६५० नेपाली वैधानिक रुपमा कार्यरत छन्। जसममा ११ हजार ९० जना महिला पनि कार्यरत छन् ।

यी स्थानमा गएर अवैध नेपालीले कुनै पनि रोजगारदाता कम्पनीबाट जब अफर लेटर लिई निवेदन दिन सक्ने छन् :

* उम सलाल सर्भिस सेन्टर
* उम सुनाइम सर्भिस सेन्टर
* मिसाइमिर सर्भिस सेन्टर
* अल रय्यान सर्भिस सेन्टर
* अल वक्रा सर्भिस सेन्टर