काठमाडौँ–  ५५ वर्षे उमेर हदका कारण बुधबार अवकास पाएका नेपाल प्रहरीको लागू औषध नियन्त्रण ब्यूरो प्रमुख एसएसपी दिलिप चौधरीले आफूमाथि अन्याय भएको बताएका छन् ।

लागू औषध नियन्त्रण व्यूरोले मिति २०७७ बैशाख १७ देखि २०७८ असार ९ गतेसम्म गरेका महत्वपूर्ण उपलब्धीहरु सार्वजनिक गर्दै उनले आफूलाई डिआइजी हुनबाट संगठन र राज्यले बञ्चित गरेको बताए ।

 उनले आफू एसपी हुँदा १ नम्बरमा भए पनि डिआइजी हुनबाट संगठन र राज्यबाट चलखेल भएको बताए । उनले आफ्नो बढुवा माथिल्लो निकायबाटै रोकिएको बताउँदै २०७४ मा भएको निर्वाचनको कुरालाई लिएर विभेद भएको आफूले जानकारी पाएको सुनाए ।

निर्वाचनमा आफूले कसैलाई काखा र कसैलाई पाखा नगरेको जिकिर गर्दै नखाएको विष लागेको तर्क गरे । एसएसपी चौधरीले आफू लागू औषध ब्यूरो प्रमुख भएदेखि गरेका कार्यहरुको समेत संक्षिप्त जानकारी दिए ।

गत तीन वर्षको अनुपातमा लागू औषध सम्बन्धी मुद्दामा कमी आएको समेत बताए । उनले यो वर्ष ६५ वटा मुद्दा दर्ता भएकोमा पक्राउ पर्नेमा पुरुषको संख्या बढेको र महिलाको संख्यामा कमी आएको जानकारी दिए ।

त्यस्तै गाजाँ बरामदको संख्या घटेको भए पनि खैरो हिरोइन कारोबारी गर्नेको संख्या बढेको बताए । उनले नेपाल भरी लागू औषध सम्बन्धी मुद्दा दर्ता संख्या ३० हजार ९ सय ७३ रहेको र लागू औषधको ब्यूरोले मात्रै दर्ता गरेको मुद्दा ३ सय ५० वटा रहेको जानकारी दिए ।