एक पटक दरबारमा एउटा हीरा व्यापारी आयो । ऊसँग एकजोडी हीरा थियो । त्यसमा एउटा सक्कली थियो भने अर्को नक्कली । व्यापारीले चुनौती दिँदै भन्यो— यी दुईमध्ये सक्कली हीरा चिन्ने व्यक्ति नै त्यसको मालिक हुनेछ ।

दुवै हीरा उस्तै देखिन्थे । दुवैको चमक उस्तै थियो । सक्कली हीरा चिन्न गाह्रो थियो । दरबारको प्रतिष्ठाको प्रश्न थियो । त्यसैले कुनै दरबारी अगाडि आइरहेको थिएन ।

अचानक एक अन्धो व्यक्ति अगाडि आयो । उसले चुनौती स्वीकार गर्‍यो । छुने बित्तिकै कुन सक्कली हीरा हो भनेर थाहा पायो । सबै अचम्ममा परे ।

राजाको प्रश्नमा उसले भन्यो— सक्कली हीरा चिन्न एकदमै सजिलो छ । श्रेष्ठ व्यक्तिलाई जस्तै सक्कली हीरालाई पनि तातोले असर गर्दैन । त्यसले हरेक स्थितिमा आफ्नो सन्तुलन बनाइराख्छ । गर्मी वातावरणमा तातो हुने हीरा नक्कली हो । अतः सक्कली हीरा चिन्न सजिलो भयो ।

साभार : ‘विश्वका उत्कृष्ट प्रेरक प्रसङ्गहरु’ पुस्तकबाट