काठमाडौं–कोभिड महामारी पछि नेपालमा सर्वाधिक फस्टाएको व्यवसाय भनेको म्यूजिक भिडियो नै हो भन्दा फरक नपर्ला । किनकी यो समयावधिमा कोभिडअघिको समय भन्दा बढी नै म्यूजिक भिडियो बने । भिडियोमा पल शाह, पुष्प खड्का, आकाश श्रेष्ठ, पुजा शर्मालगायतका कलाकारहरुले अभिनय गरिरहँदा अभिनेता राजेश हमाल पनि भिडियोमा जोडिए । उनले झण्डै दर्जनको हाराहारी भिडियोमा अभिनय गरिसकेका छन् ।

भिडियोका मामलामा अभिनेता अनमोल केसी अपवाद छन् । अर्थात् उनले अहिलेसम्म कुनै पनि भिडियोमा आफ्नो उपस्थिति दर्शाएका छैनन् । नेपाल र अष्ट्रेलियामा रहेको एम्पायर एजुकेसनले बुधबार आफूलाई ‘ब्राण्ड एम्बेसडर’ घोषणा गरेपछि पत्रकारमाझ अनमोलले अहिलेलाई म्यूजिक भिडियो जरुरी नरहेको बताए । ‘नेपालमा म्यूजिक भिडियोको सुरुवात मेरो बुवाले नै गर्नुभएको हो । म म्यूजिक भिडियोलाई राम्रो मान्छु । फिल्ममा चारदेखि पाँचवटा गीत छ भने मैले अहिले नै म्यूजिक भिडियोमा काम गर्नुपर्छ भन्ने जरुरी लाग्दैन’, उनले भने ।

उनले ऐम्पायरसँगको सम्झौता ‘मनको सम्झौता’ रहेकाले सम्झौता अवधि यति नै हो भन्ने नभएको दाबी गरे । उनले विदेश जाने कुरा नराम्रो नरहेको भन्दै विदेशमा गएर सिकेका ज्ञानलाई नेपालमा फर्किएर उपयोग गर्न युवाहरुलाई आव्हान गरे ।

कार्यक्रममा एम्पायरका प्रबन्ध निर्देशक स्वतन्त्रप्रताप शाहले १५ वर्षकाे इतिहास बाेकेकाे एम्पायरले अनमाेललाई एम्बेसडर बनाउन पाउदा खुशी लागेकाे बताए ।