बुटवल– सरकारी कार्यालय खुला र निजी सवारी साधन सञ्चालनलाई केही खुकुलो पार्दै रूपन्देहीमा असार १४ गतेसम्म निषेधाज्ञा थप गरिएको छ ।

मंगलबार जिल्ला प्रशासन कार्यालय रूपन्देहीले एक साता निषेधाज्ञा थप गरेको हो ।

थप गरिएको निषेधाज्ञामा निजी सवारी साधनको सञ्चालनलाई जोरबिजोर प्रणालीमा सञ्चालन गर्न अनुमति दिएको छ । तर सार्वजनिक यात्रुवाहक सवारी साधन सञ्चालनलाई भने रोक लगाइएको छ । जोरबिजोर प्रणालीमा सञ्चालन गर्न अनुमति दिएपछि सडकमा सवारी साधानको चाप बढेको छ ।

रुपन्देहीमा विवाहको लागि दुईवटा साना सवारी साधनमा बढीमा १० जनासम्म जन्ती जान पाइने छ । तर भेला, महोत्सव, सभा, जुलुसलगायत मानिसको भीडभाड हुने कुनै पनि क्रियाकलाप सञ्चालन गर्न पाइने छैन ।

त्यस्तै होटल, पार्टी प्यालेस तथा रेस्टुरेन्ट खोल्न, सिनेमा हल, सेमिनार, तालिम, गोष्ठी सञ्चालन गर्न पनि रोक लगाइएको छ । जिल्ला प्रशासन कार्यालय रूपन्देहीका प्रशासकीय अधिकृत जनक थापाले आन्तरिक नित्य पूजा बाहेकका सबै धार्मिक सांस्कृतिक गतिविधि सञ्चालनमा पनि रोक लगाइएको जानकारी दिए ।