काठमाडौं– गीतकार बुद्धवीर लामाले आफ्नो गीत लेखन करियरमा अमेरिकामा पहिलो एकल साँझ गर्ने भएका छन् । अमेरिकामा उनको पहिलो एकल साँझ भए पनि संगीत करियरमा उनको यो दसौं एकल साँझ हुनेछ ।

आगामी शनिबार साँझ पेन्सिलभेनिला राज्यको ह्यारिसबर्ग शहरमा आयोजना हुने कार्यक्रममका लागि लामा अमेरिका पुगिसकेका छन् ।

कार्यक्रममा अमेरिका निवासी नेपाली भाषी कलाकारहरु अर्जुन गुरुङ, यमु राई, टिका लामिछाने, निर्मल गुरुङ, पुष्प गजमेर, वीरेन्द्र गुरुङलगायतले बुद्धवीरका गीत सुनाउनेछन् ।

यसअघि लामाले काठमाडौमा आठ पटक र झापामा एक पटक एकल साँझ आयोजना गरिसकेका छन् ।

लामा पुर्व म्याराथन धावक पनि हुन् । अमेरिकाको एकल साँझबाट उठेको रकम आफुले जन्मथलो इलामको बौद्धधाममा पहिलो पटक म्याराथोन दौड आयोजना गर्ने लामाले बताए ।

करिव ४ दशकदेखी गीत लेखनमा क्रियासिल लामाका ‘धेरै चोटी आँखा जुध्यो’, ‘चलेछ बतास सुस्तरी’, ‘बादलुको घुम्टोले’, ‘खुट्टा तान्दै गर’, ‘आज हाम्रो भेट भाको दिन’, ‘चोली राम्रो पाल्पाली ढाकाको’, ‘भुपु मायालु’ लगायत सयौ गीतहरु लोकप्रिय छन् ।