मुम्बई– दक्षिण भारतीय स्टार प्रभाष यतिबेला ओम राउत निर्देशित फिल्म ‘आदिपुरुष’को काममा व्यस्त छन् । यो फिल्ममा अभिनेता सैफ अली खान भिलेन चरित्रमा देखिदैछन् ।

बलिउड ‌हंगामामा प्रकाशित समाचारअनुसार ‘रामायण’मा आधारित फिल्ममा प्रभाषले आदिपुरुषको भूमिका निर्वाह गर्नेछन् । जहाँ अभिनेत्री कृति सेनन सीता बन्नेछिन् भने सैफ रावण हुनेछन् । फिल्ममा सनी सिंह निजरको पनि अभिनय रहनेछ । तर उनको भूमिका खुलाइएको छैन ।

यहीबीच प्रभाषको ‘आदिपुरुष’ लुक्सको तस्वीर ट्वीटरमा सार्वजनिक भएको छ । फिल्म युनिटले नै सार्वजनिक गरेको तस्वीरपछि फ्यानमा कौतुहलता जागेको छ ।

तस्वीरमा प्रभाषले क्याजुअल पहिरनमा चस्मा लगाएका छन् । यो लुक्सलाई उनका फ्यानले सामाजिक सञ्जालमा भाइरल बनाएका छन् । प्रभाषले हालैमात्र फिल्म ‘राधे श्याम’को सुटिङ पुरा गरेका थिए ।