मुम्बई(बलिउड लाइफ)– अभिनेता सलमान खान फिल्म ‘टाइगर’को फ्रेञ्चाइजीको तेस्रो फिल्म ‘टाइगर ३’लाई लिएर चर्चामा छन् । फिल्मको रिलिज, कलाकार र सुटिङ लोकेसनले गर्दा पनि उनको चर्चा र व्यस्तता बढ्दो छ । यद्यपि उनले फिल्मसँग जोडिएका कुनै पनि कुरा खुलाएका छैनन् ।

उनले मंगलबार एक भिडियो आफ्नो इन्स्टाग्राम एकाउण्टमा राखेका छन् । जुन भिडियोमा उनी जिममा पसिना बगाइरहेका छन् । भिडियोमा उनको शानदार शरीर पनि देखिएको छ ।

‘मलाई लाग्छ कि यो व्यक्ति टाइगर ३ का लागि तालिम लिइरहेको छ’, सलमानले क्याप्सन लेखेका छन् । यो भिडियो सामाजिक सञ्जालमा भाइरल भइरहेको छ ।

रिलिज भएको केही घण्टामै भिडियोलाई ३० लाख बढीले हेरिसकेका छन् । ‘टाइगर’ फ्रेञ्चाइजीलाई एक स्पाई फिल्मको सिरिज मानिएको छ । यो फिल्मको पहिलो अंश ‘एक था टाइगर’ सन् २०१२ मा रिलिज भएको थियो । यसको निर्देशक कबीर खानले गरेका थिए ।

यो फिल्मको सफलता पछि सन् २०१७ मा फिल्म ‘टाइगर अभी जिन्दा है’ रिलिज भयो । यो फिल्मको निर्देशन अली अब्बास जफरले गरेका थिए ।