जनकपुरधाम– जनकपुरधामस्थित यातायात व्यवस्था कार्यालय मंगलबारदेखि नियमित खुल्ने भएको छ । यातायात कार्यालयले कोरोना महामारीका कारण बन्द रहेको सेवा सञ्चालन हुने सूचना जारी गरेको हो ।

कार्यालय प्रमुख वीरेन्द्र यादवले सोमबार सूचना जारी गर्दै मंगलबारदेखि भीडभाड नहुनेगरी स्वास्थ्य सुरक्षाको मापदण्ड पालना गरी सर्वसधारणको लागि कार्यालयको सेवा सुचारु हुने जानकारी दिए ।

यद्यपि कोरोना महामारीमा भीड नियन्त्रण गर्न केही सेवा घटाइएको छ । कार्यालयबाट सवारी कर, नवीकरण, बाटो इजाजत पत्र, राजस्व दाखिला सेवा, सवारी चालक अनुमति पत्र नवीकरण, प्रयोगात्मक परीक्षा पास भई राजस्व बुझाउन बाँकी सेवाग्राहीको राजस्व बुझाउने सेवा मात्र सुचारु हुने प्रमुख यादवले बताए ।

नयाँ तथा वर्ग थपको आवेदन अर्को सूचना जारी नभएसम्मका लागि स्थगित नै रहेको यातायात कार्यालय जनकपुरधामले जनाएको छ ।