काठमाडौं- सरकारले भारतबाट खरिद गरेको कोरोनाविरुद्धको १० लाख डोज नेपाल आएसँगै शिक्षक तथा सार्वजनिक यातायातका चालक र सहचालकले पनि खोप लगाउन पाउने भएका छन् ।

भारतको सेरम इस्न्टिच्युटसँग खरिद गरिएको २० लाखमध्ये १० लाख डोज खोप आइतबार काठमाडौं आइपुगेको छ ।

स्वास्थ्य तथा जनसंख्या मन्त्रालयका सचिवसहित मातहतका प्रमुखहरुको शनिबार बसेको बैठकले कोभिड-१९ खोप कार्यान्वयनको प्रगति पुनरावलोकन र समीक्षा गर्दै महाविद्यालय तथा विद्यालयका प्रध्यापक, शिक्षक तथा कर्मचारीहरु, सार्वजनिक यातायातका चालक तथा सहचालकहरुलाई दोस्रो प्राथमिकताको खोप लगाउने निर्णय गरेको हो ।

उनीहरुसँगै जेष्ठ नागरिकले फागुन २३ गतेदेखि कोरोना खोप लगाउन पाउनेछन् । मन्त्रालयले २३ फागुनबाट जेष्ठ नागरिकलाई खोप दिने निर्णय गरिसकेको छ ।

यस्तै, जोखिम तथा अग्रपंतिमा रहेका दर्ता भएका औषधी पसलमा कार्यरत र प्रयोगशालामा कार्य गर्ने अन्य कर्मचारी तथा सफाइकर्मीहरुलाई समेत यही चरणमा खोप उपलब्ध गराइने भएको छ । उनीहरुले ९ र १० फागुनमा खोप पाउनेछन् ।

भारत सरकारले १० लाख डोज खोप अनुदानमा दिएपछि नेपालले १४ माघदेखि कोरोना खोप अभियान सुरु गरेको थियो ।