धरान–कोभिड महामारी लगत्तै झण्डै साढे दुई वर्षपछि आयोजना भएको ‘टुबोर्ग मेगा लाइभ कन्सर्ट’मा रकपप व्याण्ड ‘रविन एण्ड द न्यु रिभोलुसन’ले आफना हिट गीतहरुसँगै धरानको चिसो मौसमलाई तताएको छ ।

धरान १२ स्थित पब्लिक हाइस्कुलको खेलमैदानमा आयोजित कन्सर्टमा व्याण्डका प्रमुख गायक रविन तामाङले नेपाली ढाका टोपीमा सजिएर ‘नेपाल–नेपाल’ बोलको गीतबाट आफ्नो प्रस्तुति सुरु गरेका थिए ।

चार वर्षपछि कन्सर्टका लागि धरान आएका उनले ‘भेटे मैले शिवजी’, ‘केटाकेटी पहिलो नाम’, ‘जति माया लाएपनि’, ‘चिसो चिसो हावा’ र ‘दम मारो दम’लगायतका दर्जन गीत गाएका थिए । रविन आफ्नो टिमका प्रविणदास श्रेष्ठ, हरिकृष्ण महर्जन र विजय विश्वकर्मासँग स्टेजमा देखिएका थिए ।

कोभिड पछिको आफ्नो पहिलो ओपन कन्सर्ट भएको बताउंदै गायक तामाङले सबैलाई सुरक्षाका लागि मास्क, सेनिटाइजर प्रयोग गर्न र खोप अनिवार्य लगाउन अनुरोध गरे । कार्यक्रममा स्थानीय प्रतिभाहरु हिना मल्ल बराइली र दिपिका बस्नेतले आफ्नो प्रस्तुति दिएका थिए ।

टुबोर्गको प्रस्तुति र सिल्भर इन्टरटेनमेन्टको आयोजनामा यसअघि धरानमा ‘टुबोर्ग मेगा लाइभ कन्सर्ट २०१७’ र पथरीमा ‘टुबोर्ग मेगा लाइभ कन्सर्ट २०१८’ आयोजना भईसकेको छ । मेगा लाइभ कन्सर्टको यो तेस्रो संस्करण हो ।