मुम्बई(दैनिक भास्कर)– बलिउड अभिनेत्री शिल्पा शेट्टीकी पति राज कुन्द्रालाई मुम्बई क्राइम ब्राञ्चले सोमबार पक्राउ परेपछि उनी यतिबेला चर्चामा छन् । प्रहरीले उनलाई अश्लील फिल्म बनाएर केही एप्समार्फत प्रसारण गरेको आरोप लगाएको छ ।

राज कुनै विवादमा पहिलोपटक मुछिएका होइनन् । उनी यसअघि आइपीएल सट्टाबाजीमा दोषी पाइएका छन् । राजस्थान रोयल्सका सह–संस्थापक राजले केही वर्ष अघि आफूले सट्टेबाजी गरेको स्वीकारेका थिए ।

मध्यम वर्गीय परिवारमा जन्मिएका राजलाई उनका आमाबाबुले निकै अभावग्रस्त अवस्थामा पालनपोषण गरे । उनको जन्म लण्डनमा भएको थियो । राजका पिता बालकृष्ण कुन्द्रा पञ्जाबको लुधियानाको भए पनि उनी लण्डनमा बस्थे ।

जहाँ उनी बस कण्डक्टर बने । राजकी आमा उषा रानी कुन्द्रा एक पसलमा काम गर्थिन् । राजका पिताले एक रेष्टुरेन्ट खोलेपछि एकदिन राजलाई ‘कि रेष्टुरेन्ट चलाउनु या आफैं काम सुरु गर्नु’ भनेपछि यसलाई गम्भीरतापूर्वक लिँदै उनले आफ्नो यात्रा सुरु गरे ।

त्यसपछि उनी केही पैसा लिएर दुबई गए । उनले त्यहाँ हीरा कारोबारीलाई भेटे, तर कुराकानी गरेनन् । त्यसपछि उनी दुबईबाट नेपाल आए र केही पश्मिना सल किनेर ब्रिटेनका केही ब्राण्डेड स्टोरमा बेच्न सुरु गरे । यो व्यापारमा प्रतिष्पर्धा बढेपछि उनले यसलाई छोडेर हिराको कारोबार गर्न दुबई गए ।

राजको १० कम्पनी छन् । उनलाई सन् २००४ मा एक ब्रिटिस पत्रिकाले ‘सबैभन्दा धनी एशियाली ब्रिटिश’को सूचीमा १ सय ९८ औं स्थानमा राखेको थियो । उनीसँग २८ सय करोडको सम्पत्ति छ ।

उनले दुईपटक विवाह गरेका छन् । उनको पहिलो विवाह कविता कुन्द्रासँग भएको थियो । कवितासँग अलग्गिएपछि उनले अभिनेत्री शिल्पा शेट्टीसँग विवाह गरे ।