काठमाडौँ – नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाललाई अब विकास, समृद्धि, अध्ययन अनुसन्धान र अन्वेषणको एउटा नयाँ युगतिर लैजानुपर्ने बताएका छन् ।

‘फादर सन अभियान’ ले मंगलबार काठमाडौँमा गरेको “हिउँ रहे पानी रहन्छ, पानी रहे जीवन वातावरणको अधिकार, मानवअधिकार” विषयक अन्तरक्रियामा प्रचण्डले यस्तो बताएका हुन् ।

उनले एउटा समृद्ध समाज निर्माण गर्न अनुसन्धान र अन्वेषणको क्षेत्र महत्वपूर्ण भएको बताए । वातावरणको संरक्षणका निम्ति नेपाली अध्यता र विज्ञहरुले गरेको प्रयास सकारात्मक भएको उनको भनाइ छ । उनले कृषिका क्षेत्रमा युवा वैज्ञानिकहरुले देखाएको विज्ञता निकै उत्कृष्ट देखिएको पनि बताए ।

उनले नेपाली युवा वैज्ञानिकहरुको अनुसन्धान र अन्वेषणको क्षमता अन्य कुनै देशको भन्दा कम नरहेको तर्क गरे ।