मुम्बई(दैनिक भास्कर)– रामानन्द सागरको १९८७ को टेलिभिजन शो ‘रामायण’मा ‘भगवान राम’को भूमिका निर्वाह गरेर लोकप्रिय बनेका अभिनेता अरुण गोविल फिल्ममा पुनः ‘श्रीराम’को भूमिकामा देखिने भएका छन् ।

अरुण फिल्म ‘ओ माई गड’को सिक्वेलमा ‘भगवान राम’को भूमिकामा देखिन लागेका हुन । अश्विन वर्दे र अक्षय कुमारले निर्माण गर्न लागेको यो फिल्मको निर्देशन अमित रायले गर्दैछन् ।

अक्षय फिल्ममा अरुणलाई ‘भगवान राम’ बनाउन निकै उत्सुक थिए । अक्षयको बुझाईमा यो चरित्रमा अरुणभन्दा बढी लोकप्रिय अनुहार कोही छैन ।

‘रामायण’को अडिसन ताका अरुण अस्वीकृत भएका थिए । रामानन्दलाई अरुणको धुम्रपान सेवनको बानी मनपरेको थिएन । खराब आदत भएको व्यक्तिलाई कसरी राम बनाउन सकिन्छ भन्ने रामानन्दको बुझाई थियो । तर अरुणले आफूले यो बानीलाई छोड्ने भरोसा दिलाए । अरुणको लुक टेस्टमा उनको मुस्कान देखेर रामानन्द प्रभावित भएपछि उनलाई तुरुन्तै अनुबन्ध गरेका थिए ।

फिल्म ‘ओ माइ गड २’मा अक्षयका अलावा पंकज त्रिपाठी र यामी गौतम फाइनल भइसकेका छन् । पहिलो फिल्म धार्मिक कट्टरता र अन्धविश्वासमा आधारित रहे पनि दोस्रो फिल्मले भारतीय सुरक्षा प्रणालीलाई देखाउनेछ ।