काठमाडौँ– कोरोनाविरुद्ध लड्न अमेरिका सरकारले उपलब्ध गराएको स्वास्थ्य सामग्रीको पछिल्लो खेप नेपाल आइपुगेको छ । अमेरिकी अन्तर्राष्ट्रिय विकास नियोग तथा अमेरिका सरकारले नेपाललाई निरन्तर दिँदै आएको सहयोगको पछिल्लो खेप नेपाल आइपुगेको हो ।

विभिन्न अत्यावश्यक स्वास्थ्य सामाग्री बोकेर क्यालिफोर्नियाको ट्राभिल एयर फोर्स बेसबाट उडेको विमान आज काठमाडौं आइपुगेको हो ।

यो कोरोना महामारी नियन्त्रण तथा जीवन रक्षाका लागि दिइएको यो सहयोगमा पल्स अक्सिमिटर र व्यक्ति संरक्षणका पोशाक तथा उपकरणहरु रहेका छन् ।

अमेरिकाको संघीय आपतकालिन व्यवस्थापन एजेन्सी फेमाले प्रदान गरेको ४ लाख केएन ९५ मास्क र क्यालिफोर्नियाको गभर्नर अफिसले प्रदान गरेको साढे ४ लाख डिस्पोजेबल गाउन समेत यो सहयोगमा समावेश छन् ।

अमेरिकाले नेपाललाई खोप सहयोग गर्ने घोषणा समेत गरिसकेको छ । अमेरिकाले जुनको पहिलो साता नेपालसहित दक्षिण एसिया र दक्षिणपूर्वी एसियाका १६ देशलाई ७ मिलियन डोज भ्याक्सिन उपलब्ध गराउने घोषणा गरेको थियो ।

तर यो भ्याक्सिन अमेरिकाले नेपालमा कहिले पठाउने र कति पठाउने भन्ने अझै स्पष्ट भएको छैन ।

तस्वीर : युएसएआईडी