जनकपुरधाम– धनुषाको हँसपुर नगरपालिकाले जिल्लामै पहिलो पटक बजेट ल्याएको छ । शनिबार पालिकाको आठौं नगरसभाबाट अगामी आर्थिक वर्षको बजेट नगर उपप्रमुख रेणुदेवी झाले प्रस्तुत गरेकी हुन् ।

पालिकाले कोरोना व्यवस्थापनमा र पूर्वाधार विकासमा केन्द्रीत रहेर ६२ करोड ८० लाख ५६ हजार बजेट विनियोजन गरेको छ ।

उपप्रमुख झाले प्रस्तुत गरेको बजेट व्यक्तव्यमा चालु तर्फ ४४ करोड पाँच लाख ८१ हजार अर्थात ७० दशमलव १५ प्रतिशत विनियोजन गरिएको छ भने पूँजीगत तर्फ १८ करोड ७४ लाख ७५ हजार अर्थात २९ दशमलब ८५ प्रतिशत विनियोजन गरिएको छ ।

पालिकाले चालु आर्थिक वर्षमा राजस्व बाँडफाँडबाट आठ करोड दुई लाख ६४ हजार, नेपाल सरकारबाट प्राप्त हुने वित्तिय समानिकरण अनुदान वापत १२ करोड ५७ लाख र संघीय सरकारबाट सर्सत अनुदान वापत २० करोढ १३ लाख प्राप्त गरेको आयव्ययमार्फत जानकारी दिएका छन् ।

यस्तै, प्रदेश सरकारबाट वित्तिय समानिकरण अनुदान वापत ७३ लाख ७२ हजार, पोषण तथा अन्य कार्यक्रममार्फत प्राप्त गरेको २९ लाख २० हजार, नगरपालिकाको राजस्वबाट अनुमानित तीन करोड र गत आर्थिक वर्षबाट ल्याएको मौज्दात १६ करोड ५० लाख गरी करिब ६३ करोडको सन्तुलित बजेट प्रस्तुत गरेको हो ।

कोरोना महामारीको व्यवस्थापन र पूर्वाधार विकासको कार्यलाई प्राथमिकतामा राखेर बजेट विनियोजन गरिएको छ । पूर्वाधार विकासको लागि ३५ करोड ६१ लख ३५ हजार विनियोजन गरिएको छ भने वातारण तथा विपद व्यवस्थापनको लागि पाँच करोड विनियोजन गरेको हो ।

यस्तै, कार्यालय सञ्चालनको लागि तथा प्रशासनिक खर्चको लागि आठ करोड दुई लाख ६४ हजार निनियोजन गरेको बजेट व्यक्तव्यमा उल्लेख छ । पालिकाले नगरसभाको अवसरमा कर्मचारीको मनोबल बढाउन स्वास्थ्य शाखा प्रमुख र वडा सचिवलाई साइकलसमेत प्रदान गरेको छ ।