काठमाडौँ– दशैँ मनाउँन गाउँ गएकाहरू काठमाडौँ फर्कन थालेका छन् ।

काठमाडौँ भित्रनेको संख्या बढेसँगै सडक बजारमा चहलपहल शुरु भएको छ । हरेक वर्ष जसो दशैँमा केही दिन सुनसान बन्ने काठमाडौँ शहर दशैँ सकिएपछि भिडभाड हुने गर्दछ ।

काठमाडौँमा बसेर विभिन्न पेशा व्यवसाय तथा अध्ययन गर्ने व्यक्ति दशैँ मनाउन जन्मघर अर्थात गाउँ जाने गर्दछन् । अहिले गोङ्गबु, कोटेश्वर, कलङ्की, बल्खुलगायतका क्षेत्रहरुमा काठमाडौँ आउने मानिसहरुको चलपहल बढेको छ ।

यी क्षेत्रमा केही दिनअघि काठमाडौँ छोड्नेको चहलपहल थियो भने अहिले काठमाडौँ भित्रनेको छ । काठमाडौँ उपत्यकाका बजार पनि विस्तारै चलायमान हुँदैँ गएका छन् । दशैँमा बन्द भएका पसल खुल्न थालेका छन् ।

दशैँको टीकाको चौँथो दिन आज पनि आफन्त तथा मान्यजनबाट टीका र जमरा लगाई आशीर्वाद लिने क्रम जारी नै छ । दशैँको टीकाको दिनदेखि कोजाग्रत पूर्णिमासम्म टीका लगाउने चलन छ ।

व्यापार व्यवसाय तथा रोजगारी गर्ने अधिकांश मानिसहरु पूर्णिमासम्ममा काठमाडौँ आउने गर्दछन् भने अध्ययनको गर्न बसेकाहरु तिहार र छठ पर्वपछि फर्कने गर्दछन् ।