मुम्बई(न्यूजनेसनटीभी)– मुम्बई प्रहरीले बलिउड अभिनेता साहिल खानसहित पाँचविरुद्ध प्रख्यात बडी बिल्डर र पूर्व ‘मिस्टर इण्डिया’ मनोज पाटिललाई आत्महत्याका लागि उक्साएको आरोपमा शुक्रबार मुद्धा दर्ता गराएको छ ।

बिहीबार बिहान आत्महत्याको प्रयास गरेका पाटिलको बीएमसीद्वारा सञ्चालित आरएन कूपर अस्पताल विले पार्लेमा उपचार भइरहेको छ ।

प्रहरीका अनुसार पाटिलले ओशिवाराको सैलीला अपार्टमेन्टमा रहेको घरमा केही औषधि खाएर आत्महत्याको प्रयास गरेका थिए । तर उनको परिवारले उनलाई तुरुन्तै अस्पताल पुर्याएपछि उनको ज्यान जोगिएको थियो ।

२९ वर्षे पाटिल मोडलिङमा व्यस्त कलाकार हुन् । हालैमात्र उनले ओशिवारा प्रहरीमा एक उजुरी दर्ता गर्दै आफूलाई खान र अन्य व्यक्तिहरुले पेशागत करियरमा अवरोध सिर्जना गरेको र सामाजिक सञ्जालको माध्यमबाट बद्नाम गर्न खोजेको आरोप लगाएका थिए ।

प्रहरीले पाटिलको पत्रलाई प्राथमिकता दिएर दर्ता गराएको छ । पाटिल पूर्ण रुपमा स्वस्थ भएपछि उनको बयान लिइने र त्यसका आधारमा पीडकलाई पक्राउ गरिने जनाएको छ । तर खानले भने आफूमाथि पाटिलले लगाएको सबै आरोपको खण्डन गरेका छन् ।

प्रहरीले खान र अन्यविरुद्ध भारतीय दण्ड संहिताको धाराअनुसार आत्महत्याका लागि उक्साएको, अपराध गर्ने प्रयास, मानहानी, आपराधिक धम्कीलगायतका विषयमा मुद्धा दर्ता गराएको छ ।