काठमाडौँ- अमेरिकी राष्ट्रपति जो बाइडेनले अफगानिस्तान अमेरिकी सैनिक फिर्ताको बचाउ गरेका छन् ।

तालिबानले अफगानिस्तान कब्जा गर्दै विजय भएको घोषणा गरेपछि  बाइडेनले सोमबार सम्बोधन गर्दै आफ्नो निर्णयको बचाउ गरेका हुन् ।

युद्धग्रस्त अफगानिस्तानमा तालिबानको नियन्त्रणपछि चौतर्फी आलोचना खेपिरहेका बाइडेनले क्याम्प डेभिडबाट सोमवार ह्वाइट हाउस फर्केर भने, ‘कति थप अमेरिकी जीवन त्यसको लागि अर्पण गर्नुपर्थ्यो ?’

अहिलेको अफगानिस्तानको अवस्थाको जिम्मेवार अफगानी राजनीतिक नेताहरु र अमेरिकाले तालिम दिएर पनि लड्न नचाहेका अफगान आर्मी रहेको बाइडेनको आरोप छ ।

‘अफगान फौजले उनीहरूकै लागि लड्न नचाहेको लडाइँ अमेरिकी सैनिकहरू लड्न सक्दैनन् र लड्नु र युद्धमा मर्नु हुँदैन,’ उनले भने ।

सशस्त्र विद्रोहीहरू फेरि सत्तामा पुगिरहँदा अफगानिस्तानमा करिब २० वर्षको अमेरिकी नेतृत्वको गठबन्धनको उपस्थिति पनि अन्त्य भएको छ ।